કવિતાઓ નું પંચક!

[૧]

હોળીકા બાળી 

પ્રહલાદને બચાવ્યો.

લોકો પોતાની અંદર 

કેટલી હોળીકાઓ 

રાખતાં હશે? 

ક્યારેક પ્રહલાદ ઓછા 

પડતા હશે એટલી 

હોળીકાઓ...

[૨]

રંગબેરંગી પાણી 

અને રંગો વડે શું 

રંગાવાનું એ લોકો 

વિચારતા હશે

જે લોકો એ 

જીવનમાં 

સફેદ  અને કાળો 

સિવાય એક પણ 

બીજો રંગ ના જોયો

હોય એ લોકો તો 

આ બધાં રંગોથી 

ડરી જ જાય...

[૩]

ગુલાલ, કેસુડો 

મને 

કાચીંડાની યાદ

અપાવે છે.

કાચિંડો તો દરરોજ

ધુળેટી રમે નહી??

ધુળેટી સિવાય

પણ આવા 

કેટલાય કાચીંડાઓને

મનુષ્ય સ્વરૂપે 

ફરતાં 

રંગ બદલતાં જોયા છે 

પણ.. 

મને શું હક છે 

એ વિષે બોલવાનો?

જયારે 

હું જ 

રંગ બદલતો હોઉં.

[૪]

રંગો - તરંગો 

તરંગો તો 

એવા ઉદભવે છે 

કે 

આખી પૃથ્વીને 

સફેદ - કાળા 

રંગે રંગી દઉં.

આ રંગો નું કામ જ શું છે?

રંગીન દુનિયા કે 

રંગહીન દુનિયા?

કાળું - ધોળું 

બસ બીજા રંગો તો નહીં.

કાળા ધોળાં માંજ 

પડવાનું - આખડવાનું 

લોકો બીજા રંગો ભરી ને 

આકર્ષવાનો પ્રયાસ 

તો ના કરે...

[૫]

૨ દિવસ 

હોળી ધુળેટી.

૩૬૩ દિવસ 

ખૂન, આત્મહત્યા 

અકસ્માતો 

બળાત્કારો 

લુંટ 

ચોરી 

આ બધી હોળીકાઓ ની 

શાલ નહીં

ઉડી જતી હોય?

કે પ્રહલાદ 

હવે પોતે એનાં

બાપની જેમ 

મદ્ થી 

છકી જઈને 

આવા "તાપણાંઓમાં"

નહી બેસતો હોય?  

(c)મનન ભટ્ટ (૨૦૧૪, દિવસ: હોળી )